Asambleja e Përgjithshme e Kombeve të Bashkuara

Në Asamblenë e Përgjithshme të Kombeve të Bashkuara janë të përfaqësuar me të drejta të barabarta të gjitha shtetet anëtare nëpërmjet një delegacioni me përfaqësues të qeverisë: Çdo vend ka një votë në këtë organ, i cili është qendra organizative e sistemit të Kombeve të Bashkuara.

Kombet e Bashkuara janë një organizatë ndërkombëtare me karakteristika klasike, që do të thotë, se kjo organizatë formohet nga shtete dhe se në organet e saj bashkohen përfaqësues të qeverive kombëtare. Kjo vlen pikërisht edhe për Asamblenë e Përgjithshme, e cila shpesh gabimisht përcaktohet si "parlamenti botëror". Por ajo nuk është aspak një parlament, por një forum bashkëpunimi dhe këshillimi ndërshtetëror, edhe pse puna në plenum – sikurse është e ditur për parlamentet – përgatitet në komisione.

Vendimet merren në përgjithësi me shumicë të thjeshtë votash, në rast çështjesh të rëndësishme kërkohet shumica e dy të tretave, si p.sh. në rastin e përjashtimit apo pranimit të anëtarëve të rinj, ose në rastin e zgjedhjes së anëtarëve jo të përhershëm të Këshillit të Sigurimit. Gjithsesi, në vitet e fundit është bërë diçka e zakonshme, që vendimet të merren me konsensus pa kaluar në procedurë votimi.

Asambleja e Përgjithshme i merr vendimet e detyrueshme në mënyrë interne, pra brenda sistemit të Kombeve të Bashkuara, (p.sh. vendimet në lidhje me buxhetin e organeve ndihmëse), ndërsa në mënyrë eksterne ajo jep rekomandime, që për shtetet anëtare nuk janë të detyrueshme në kuptimin e së drejtës ndërkombëtare. Por kjo nuk do të thotë, se këto rekomandime janë pa efekt, sikurse dëshmon historia e "Deklaratës së përgjithshme mbi të drejtat e njeriut" miratuar në vitin 1948, dhe sikurse thekson edhe fragmenti i mëposhtëm:

"Edhe nëse Asamblesë së Përgjithshme i mungojnë instrumentat dhe sanksionet e forta, kjo nuk do të thotë, që deklaratat dhe rekomandimet mbeten pa efekt. Presioni publik dhe autoriteti politik dhe moral i komunitetit ndërkombëtar ka ndikuar, që deklaratat dhe rekomandimet e shumta të Asamblesë së Përgjithshme të pranohen në mënyrë universale, si dhe kanë çuar përpara në të gjithë botën zhvillimin e standardeve politike dhe juridike."

[nga: Sven Gareis/Johannes Varwick, Kombet e Bashkuara. Detyrat, Instrumentat dhe reformat; Zyra Federale Qendrore për edukim politik, seri shkrimesh vëll. 403, Bonn 2003, F. 49]

Faqe të tjera mbi organet kryesore të Kombeve të Bashkuara:

[Autor: Ragnar Müller]

[Kreu i faqes]