Pas dy luftrave të tmerrshme detyra kryesore e organizatës ndërkombëtare është Garantimi i paqes dhe i sigurisë ndërkombëtare; në këtë kontekst ka patur përpjekje për të nxjerrë mësim nga tentativa e parë e dështuar për ngritjen e një sistemi kolektiv sigurie me Lidhjen e Popujve në periudhën mes luftrave. [mbi Lidhjen e Popujve dhe parahistorine e Kombeve të Bashkuara shih Kursi bazë 2].

Nëse në kohën e krijimit të organizatës sfida më e madhe ishin luftrat ndërshtetërore, kjo situatë ka ndryshuar krejt në dekadat e fundit: ndërsa numri i luftrave ndërshtetërore bie, ai i konflikteve brendashtetërore dhe ai i fenomeneve të tilla si ai i terrorizmit ndërkufitar rritet në mënyrë të vazhdueshme [Impulse për marrjen me konceptet e luftës, dhunës dhe konfliktit gjeni në Kompleksin tematik Pedagogjia e paqes në D@dalos].

Zhvillimet në lidhje me garantimin e paqes - duke nisur nga bllokada e Këshillit të Sigurimit në Luftën e Ftohtë deri në debatin aktual rreth ndërhyrjeve humanitare - paraqiten në Kursin bazë 2.
 

Si sfond për detyrën e dytë të madhe të Kombeve të Bashkuara, dhe pikërisht për mbrojtjen e të drejtave të njeriut dhe zhvillimin e mëtejshëm të së drejtës ndërkombëtare, shërbyen në menyrë të veçantë vrasjet masive dhe krimet kundër njerëzimit gjatë regjimit të Hitlerit.

Që në vitin 1948 Asambleja e Përgjithshme miratoi një Deklaratë të Përgjithshme mbi të Drejtat e Njeriut, dokumentin qendror në historinë e të drejtave të njeriut. Zbatimi konkret ligjor i kësaj deklarate u arrit pas debatesh të gjata dhe të lodhshme me dy pakte ndërkombëtare, me Paktin mbi të Drejtat Poltike dhe Qytetare dhe me Paktin mbi të Drejtat Ekonomike, Sociale dhe Kulturore, të cilat u nënshkruan në vitin 1966 dhe hynë në fuqi në vitin 1976 [këto dokumente si dhe informacione të tjera të hollësishme në lidhje me temat e Të Drejtave të Njeriut, të Drejtave të Fëmijëve dhe të Drejtave të Grave i gjeni në  Kompleksin tematik mbi Të Drejtat e Njeriut në D@dalos].
 

Zhvillimi ekonomik dhe social përbën fushën e tretë të madhe të detyrave të Kombeve të Bashkuara. Paqja nuk kuptohet në sensin negativ të paqes vetëm si mungesë e luftës, por ajo, në kuptimin pozitiv të konceptit, përmbledh edhe çështje të zhvillimit mbarëbotëror dhe të drejtësisë [në lidhje me konceptin e paqes shih  Fragmentin "Paqja" në kuadrin e Kompleksit tematik Pedagogjia e Paqes]. Kohët e fundit, këtu është shtuar edhe fusha e detyrave mbi mbrojtjen e mjedisit si pasojë e problemeve globale sikurse janë efekti serë ose vrima e ozonit.

Që në vitin 1945 u njoh detyrimi i pazgjidhshëm për paqe dhe zhvillim. Këtë e konkretizojnë fjalët e Sekretarit të atëhershëm amerikan për Punët e Jashtme  Edward Stettinius: "Lufta për paqen duhet zhvilluar në dy fronte. Në njërin bëhet fjalë për sigurinë, ndërsa në tjetrin për ekonominë dhe drejtësinë sociale. Vetëm një fitore në të dyja frontet do t'i dhuronte botës  një paqe të vazhdueshme."

Temave të zhvillimit dhe mjedisit u kushtohen programet e shumta, komisionet, organet speciale dhe organizatat e veçanta, të cilat përbëjnë sistemin tejet të degëzuar të Kombeve të Bashkuara, me të cilin merret  Kursi bazë 4.

"1. te ruajnë paqen botërore dhe sigurinë ndërkombëtare dhe për këtë qëllim të marrin masa kolektive të efektshme për të parandaluar dhe mënjanuar kërcënimet e paqes, për të mposhtur veprimet mësymëse dhe shkeljet e tjera të paqes, si dhe për të zgjidhur me mjete paqësore sipas parimeve të drejtësisë dhe të drejtës ndërkombëtare konflikte ndërkombtare apo situata, që do të mund të çonin në shkelje të paqes; 

2. të zhvillojnë marrëdhënie miqësore mes kombeve, të cilat bazohen në parimet e barazisë dhe vetëvendosjes së popujve si dhe të marrin masa të tjera të përshtatshme për konsolidimin e paqes;

3. të ngrenë në këmbë një bashkëpunim ndërkombëtar për të zgjidhur probleme ndërkombëtare të natyrës ekonomike, sociale, kulturore dhe humanitare si dhe për të mbështetur dhe përforcuar respektimin e të drejtave dhe lirive themelore të njeriut për të gjithë, pa dallim race, seksi, gjuhe apo besimi fetar;