Didaktika Politike

Në shkencën politike nuk ka një koncept të njësuar, përgjithësisht të pranuar të politikës. Por kjo nuk është aspak diçka negative, përkundrazi, sepse është veçori e shkencave shoqërore, që asnjëherë nuk ekziston një zgjidhje e vetme, akoma më pak një zgjidhje "e saktë". Për këtë arsye, dhe me të drejtë, u ndërprenë përpjekjet pa rezultat për të gjetur një përkufizim fiks të politikës. Nëse thelbi i politikës përbëhet nga pushteti, konflikti, sundimi, paqja apo diçka tjetër, kjo varet nga problemi përkatës, nga interesat në loje si dhe nga shumë faktorë të tjerë.

Në bazë të punës sonë qëndron teoria e sistemit me konceptin e saj shumëdimensional të politikës. Këtu bëhet fjalë për një pikënisje shumë të përhapur, por jo për atë më të rëndësishmen ose më të mirën. Ajo ka përparësinë, që integron dhe lejon një mori aspektesh dhe elementësh të asaj që është politike, strukturon dhe sistematizon realitetin kompleks politik, duke u nisur nga ideja e shumëdimensionalitetit kategorik të politikës   [... më shumë mbi teorinë e sistemit].

Kemi dalluar tre dimensionet e mëposhtme të politikës: Polity, Politics dhe Policy. Polity përcakton dimensionin formal të politikës, pra aparatin normativ, rregullatorët e procedurave dhe institucionet, ku zhvillohet politika. Politics përfaqëson dimensionin procesual, pra proeset vendimmarrëse, menaxhimin e konflikteve, realizimin e qëllimeve dhe interesave. Disa prej pyetjeve klasike të shkencës politike (cili mund t'i realizojë qëllimet e tij?; cilat janë mekanizmat rregullatore të konfliktit?; etj) i nënrenditen pikërisht këtij dimensioni. Policy zbulon dimensionin e përmbajtjes së politikës, trajtimin e problemeve dhe përmbushjen e detyrave përmes sistemit politiko-administrativ me ndihmën e vendimeve të detyrueshme për të gjithë (përcaktime autoritare vlerash) [... më shumë mbi dimensionet e politikës].

Ky koncept i politikës është treguar të jetë shumë i dobishëm pikërisht në edukimin politik. Së bashku me elementët e tjerë të analizës Policy, veçanërisht me ciklin Policy, ai u jep në dorë si mësuesve ashtu edhe nxënësve një model analize, për të kuptuar realitetin kompleks politik.[... më shumë mbi ciklin Policy].