"Këto pyetje u referohen qëllimeve konkrete të mësimit të politikës dhe legjitimimit të tyre, përmbajtjeve mësimore dhe argumentimit të përzgjedhjes së tyre, premisave shoqërore, institucionale dhe individuale për të mësuar si dhe organizimit të procesit mësimor, pra përzgjedhjes së metodave dhe mjeteve, të formave të punës dhe të ndërveprimit. Pra vendimet, që mësueset dhe mësuesit duhet të marrin herë pas here në kuadër të planifikimit shtrihen në rrafshe të ndryshme, por janë gjithsesi të lidhura ngushtë me njëra tjetrën dhe kushtëzohen reciprokisht. Ato përfshijnë dhe marrin në konsideratë si njohuritë e diskutimit politiko-didaktik ashtu edhe rezultatet e shkencës politike dhe të shkencave të tjera shoqërore. 

Katalogu i mëposhtëm i pyetjeve nuk duhet keqkuptuar si një recetë për planifikimin e mësimit. Edhe pse të gjithë përbërësit janë aty, në përfundim nuk kemi një njësi të gatshme mësimore, po kështu edhe suksesi i mësimit nuk është i garantuar. Këto pyetje janë më tepër një instrument kërkues, me ndihmën e të cilit mësueset dhe mësuesit gjatë planifikimit mund të kontrollojnë, nëse kanë lënë jashtë vëmendjes ide të rëndësishme ose nëse aspekte qendrore janë peshuar dhe marrë në konsideratë në masën e duhur. Po kështu, ky katalog pyetjesh nuk është aspak i plotë, dhe baza e tij nuk është një teori apo një konceptim disiplinor didaktiko-shkencor, por këtë bazë e përbëjnë problemet e vetë praktikës mësimore, të cilat më pas kanë çuar në këto pyetje. (...)

Pyetjet u janë nënrenditur tre rrafsheve të ndryshme si dhe janë sjellë në një strukturë logjike për aq sa ishte e mundur. Prej këtej mund të lindë lehtësisht përshtypja, që planifikimi i procesit mësimor është një proces aditiv, dhe se pyetjet i përmbahen një renditjeje të caktuar, e cila duhet ruajtur gjatë trajtimit. Kjo do të ishte një përshtypje e gabuar, që do të linte jashtë vëmendjes një tipar të rëndësishëm të planifikimit të mësimit, pikërisht ,që planifikimi i mësimit nuk është një proces të menduari linear por rrethor. Kjo ka një kuptim të dyfishtë: nga njëra anë fillimi i procesit të planifikimit nuk është i përcaktuar. Mësueset/it mund të fillojnë planifikimin praktikisht me cilëndo pyetje, por gjatë rrjedhës së ideve të tyre duhet të reflektojnë gjithsesi të gjitha pyetjet dhe të marrin vendimet përkatëse. Nga ana tjetër të gjitha pyetjet e planifikimit janë të lidhura ngushtë me njëra tjetrën. Kjo do të thotë se vendimi i marrë në lidhje me një pyetje ndikon në të gjitha vendimet e tjera. Diçka e domosdoshme është koordinimi dhe korrigjimi i vazhdueshëm derisa të gjitha vendimet e marra në kuadrin e planifikimit t'i përshtaten njëri-tjetrit."

[Kreu i faqes]

Temat:  Të drejtat e njeriut  I  Modele  I  Demokracia  I  Partitë  I  Evropa  I  Globalizimi  I  Kombet e Bashkuara  I  Qëndrueshmëria

Metodat:    Didaktika politike    II    Pedagogjia e edukimit    II    Metodat

     
 
Kjo ofertë Online mbi edukimin politik u zhvillua nga agora-wissen, Shoqata e Shtutgartit për përçim dijesh përmes mediave te reja dhe edukimit politik. Në rast pyetjesh apo vërejtjesh drejtohuni Ju lutem te ne.