Për të frenuar kriminalitetin në rritje dhe probleme të tjera të rinisë në Glenarden (Shteti Federal i Maryland) G. Van Standifer, Drejtor i Administratës, krijoi në vitin 1986 „Ligën e basketbollit të mesnatës“ (MBL). Të rinjve do t'u ofrohej përgjatë orëve të natës një alternativë, për t'i mbrojtur ata nga të sjellët vërdallë dhe shkelja në dërrasë të kalbur. Iniciatori u mbështet nga sipërmarrës, nëpunës policie, politikanë dhe autoritete lokale. Sipas informacioneve të MBL kriminaliteti në Glenarden u ul pas kësaj në masën 60 për qind.

Sot ka klube lokale të MBL në më shumë se 50 qytete amerikane si dhe në Puerto Rico.  Nga zyrat rajonale planifikohen dhe organizohen turne, në të cilat klubet masin forcat e tyre. Sipas informacioneve të funksionarëve të MBL lojrat tërheqin në natë 200 000 spektatorë  në të gjithë vendin dhe më shumë se 3,5 milionë i ndjekin ato nga ekrani.

Klubet zgjedhin sportistë 17 deri 25 vjeçarë nga lojra të zakonshme basketbolli, siç i gjejmë në çdo qytet. Ata shoqërohen tre deri në katër vjet nga klubet lokale të MBL. Shumica e lojtarëve të MBL janë afroamerikanë, pra vijnë nga komuniteti më i  madh në numër i lagjeve të varfra të qyteteve amerikane.

„Në parim, të gjithë djemtë e rinj mund të vijnë dhe të aktivizohen te ne“, shpjegon Tony Adams, një funksionar i MBL në Columbus (Georgia). „Diskriminimi për shkak të racës apo përkatësisë etnike nuk ekziston në përzgjedhjen tonë.“ Madje përpara çdo loje lojtarët duhet të marrin pjesë në një bisedë njëorëshe. Atje flitet rreth temave të ndryshme, si  p.sh. për një bisedë prezantimi te një punëdhënës i ri, raporti me paratë, zgjidhje konfliktesh, iniciativë vetjake, mbrojtja nga virusi HIV dhe Sida, alkooli dhe droga. Shoqëruesit i inkurajojnë lojtarët të pranojnë punën.