"Krimet për nder" (honor crimes) janë shumë të shpeshta në lindje dhe juglindje të Turqisë. Ato janë tradicionalisht të përhapura në të gjithë hapësirën e Mesdheut, në Lindjen e Mesme dhe më tej në Azi dhe në Afrikë. Për çfarë bëhet fjalë? Vajzat që kanë humbur virgjërinë, duhet të kenë parasysh që mund të vriten nga familja. Një marrëdhënie dashurie është po aq vdekjeprurëse, sa edhe një përdhunim apo abuzim seksual, madje edhe nga një anëtar i familjes. Po kaq e kërcënuar është edhe një grua që shkel kurorën me një burrë tjetër apo që shkel fejesën e stisur nga familja, pavarësisht nëse ka shkuar ose jo me një burrë tjetër.)

Numri i saktë i vrasjeve për nder nuk është i njohur, ngaqë shumë nga këto krime maskohen si aksidente. Vetëm në qytetin Urfa në Turqi, në 5 vitet e fundit janë kryer 26 vrasje për nder. Në Pakistan plagosen ose vriten çdo vit nga të afërmit qindra gra për shkak të marrëdhënieve të supozuara seksuale ilegale. Vajzat, nëse arratisen, ndiqen dhe vriten - mbyten, vriten me armë, digjen me benzinë, shtypen me makinë (nga anëtarët meshkuj të familjes) ose helmohen (nga nënat e tyre apo vjehrrat). Në raste më të rralla mjafton përjashtimi nga familja. Nganjëherë vajzat e "çnderuara" martohen shpejt. Por edhe në këtë rast, vajza kërcënohet nga vdekja nëse "humbja e nderit" zbulohet nga familja e re.

Sfondi: Sipas moralit patriarkal, nderi i të gjithë familjes varet nga virgjëria e vajzës ose nga pastërtia (dëlirësia) e gruas së martuar. Nuk ka rëndësi nëse vajza e humb vullnetarisht apo me dhunë virgjërinë. Nëse "turpi" bëhet i dukshëm për të tjerët, nga një shtatëzënësi, atëherë nderi i vajzës mund të shpëtohet vetëm nga vdekja. Gruaja e prekur nuk mund të presë ndihmën e grave të tjera në familje, sepse ato duhet ose duan të ruajnë të pacenuar nderin e familjes. "Çnderimi" i një familjeje nga vajza mund të shkatërrojë edhe shanset për t'u martuar të gjithë motrave të saj.

Në Anadollin juglindor, për shembull, dy të tretat e të gjitha martesave stisen nga familja. E rëndësishme për prestigjin e familjes është cmimi që duhet të paguajnë për t'u martuar. Për shumë djem të rinj, kjo është një shumë tepër e lartë, kështu që ata duhet të kursejnë me vite të tëra për martesën. Vajzat janë të detyruara të martohen me burra pleq. Për këtë arsye shtohet numri i arratisjes së çifteve të reja në qytetet e mëdha.

Çfarë bëhet kundër vrasjeve për nder? Vrasjet për të shpëtuar nderin e familjes, në Turqi janë të dënueshme. Megjithatë, më mirë pranohet dënimi me burg, sesa çnderimi i familjes. Shpesh, pleqësia e familjes ngarkon një anëtar të mitur të familjes, për shembull vëllanë e vogël, për të kryer vrasjen, për t'i shpëtuar dënimit (ndëshkimit). Të shumtën e herës, mundësia e vetme për gratë për t'i shpëtuar vdekjes, është arratisja. Megjithatë nuk ekzistojnë direktiva ligjore që të bëjnë të mundur azilin për këto gra. Edhe vajzat dhe gratë e atyre që kanë emigruar në Evropë, janë të kërcënuara, sidomos kur pretendojnë të kenë të drejtat që i shohin edhe te gratë evropiane.