tdh 2

Të drejtat enjeriut

Të drejtat e fëmijëve

Pjesë nga raporti "Një dekadë për fëmijët" e terre des hommes (1999)

Organizata gjermane humanitare për fëmijë "terre des hommes" është themeluar gjatë luftës së Vjetnamit në vitin 1967. Ajo organizonte fluturime shpëtuese nga Vjetnami, përmes të cilave fëmijët e plagosur në luftë dërgoheshin për shërim në spitalet gjermane si dhe gjente prindër për adoptimin e fëmijëve jetimë. Kjo organizatë, sot përfaqësohet në 25 vende të botës, duke pasur si qëllim shpëtimin e fëmijëve nga gjendja e rëndë ekonomike e shpirtërore, shtypja dhe shfrytëzimi. Pikat më të rëndësishme të punës së saj janë:

	Puna e fëmijëve (prostitucioni i fëmijëve)
	Fëmijët e rrugëve
	Fëmijët në konflikte të armatosura
	Arsimimi dhe edukimi
	Shëndetësia dhe ushqimi

terre des hommes ka një faqe të pasur interneti në gjuhën gjermane: http://www.tdh.de

Vështrim:

Pjesët e mëposhtme të nxjerra nga raporti i TDH me rastin e dhjetëvjetorit të aprovimit nga ana e Asamblesë së Përgjithshme të Kombeve të Bashkuara të Konventës mbi të Drejtat e Fëmijës përmbajnë:

1) Një kapitull mbi parimet themelore të Konventës së Kombeve të Bashkuara mbi të Drejtat e Fëmijës, si dhe përmbajtjen themelore dhe plotësimet e konventës.

2) Një kapitull mbi realitetin 10 vjet pas aprovimit; çfarë është arritur, ku qëndrojnë pikat kryesore të angazhimit në të ardhmen?

3) Shembuj nga puna e terre des hommes mbi shkeljet e rregullave të Konventës mbi të Drejtat e Fëmijës:

a) Neni 32. Shfrytëzimi ekonomik - Fëmijët nga Haiti, të cilët punojnë si shërbëtorë nëpër shtëpi

b) Neni 37 dhe 40. Gjyqësia për të rinj - Arsimimi për njerëzit, të cilët kanë kontakte profesionalisht me fëmijët që bien në konflikt me ligjet; këtu, terre des hommes jep propozime për përmirësimin e gjendjes

c) Neni 38. Konflikti i armatosur - Koalicioni për ndalimin e angazhimit të fëmijëve ushtarë

d) Neni 1 - 41. Fëmijët e rrugës në Indi - »Vatsalya Foundation« në Mahalaxmi, Mumbai të Indisë

4) Një kapitull mbi mësimet që duhen nxjerrë; terre des hommes ka formuluar 10 parime për zbatimin e suksesshëm të Konventës mbi të Drejtat e Fëmijës.

Pjesë nga raporti i TDH-së „Një dekadë për fëmijët"

1. Parimet themelore të konventës

Konventa mbi të Drejtat e Fëmijës u aprovua nga Asambleja e Përgjithshme e Kombeve të Bashkuara më 20 nëntor të vitit 1989. Ajo u firmos për një kohë të shkurtër nga 61 vende të botës, reagim ky i pashënuar më parë pas një marrëveshjeje të Kombeve të Bashkuara. Hyrja në fuqi e deklaratës më 2 shtator 1990 shënoi pikën kulminante të angazhimeve gati 70 vjeçare për ta bërë bashkësinë ndërkombëtare që të njohë nevojat e veçanta dhe ndjeshmërinë e fëmijëve. Dhjetë vjet pas aprovimit, ratifikimin e saj kanë mbetur ta nënshkruajnë vetëm dy shtete, Somalia dhe SHBA. Kjo përfshirje e gjerë e standardeve të përcaktuara në konventë zhvillohet krahas kërkesës gjithashtu të pashënuar deri tani për zbatimin në praktikë, të cilin duhet ta kishte konventa në fjalë.

Konventa mbi të Drejtat e Fëmijës nuk është në radhë të parë një katalog i të drejtave të fëmijëve, por më tepër një radhitje e përgjegjësive kundrejt fëmijëve, të cilat shtetet janë të gatshme t'i njohin. Këto mund të jenë detyrime të drejtpërdrejta p.sh. në formën e dhënies së mundësisë për arsimim apo sigurimit të gjykimit të përshtatshëm; ose indirekte si p.sh. dhënia e mundësisë prindërve, familjes së gjerë apo kujdestarëve për marrjen e përgjegjësisë së kujdesit dhe mbrojtjes së fëmijës. Konventa përmban dy koncepte me ndikime të rëndësishme:

	Interesi më i mirë i fëmijës (Neni 3) bëhet kriter detyrues për të gjitha masat që kanë të bëjnë me fëmijët.
	Prindërit apo personat e tjerë përgjegjës duhen përkrahur gjatë ushtrimit të të drejtave të tyre, duke respektuar

Konventa përmban tri plotësime të rëndësishme. Së pari, ajo shton të drejtat për pjesëmarrje të fëmijëve dhe njeh rëndësinë e informimit të vetë fëmijëve mbi të drejtat e tyre. Së dyti, konventa prek tema, me të cilat asnjëherë më parë nuk është marrë ndonjë dokument ndërkombëtar: p.sh. e drejta e rehabilitimit për fëmijët të cilët kanë përjetuar situata të tmerrshme dhe shfrytëzimin, si dhe detyrimi i qeverive për të zhdukur praktikat tradicionale, të dëmshme për shëndetin e fëmijëve. Së treti, ajo përfshin parimet dhe standardet, të cilat më parë gjendeshin vetëm në tekstet e detyrueshme, veçanërisht në lidhje me adoptimet dhe me gjykimin e të miturve.

Edhe pse ligjet dhe masat politike janë të pashmangshme për të vëzhguar respektimin e të drejtave të fëmijëve, ato megjithatë nuk mjaftojnë. Për këtë arsye, shteti duhet të marrë masa serioze për garantimin e burimeve financiare dhe njerëzore. Neni 4 i konventës thotë se shtetet duhet të bëjnë gjithçka për zbatimin e konventës dhe për garantimin e realizimit të të drejtave ekonomike, sociale dhe kulturore të fëmijëve, duke përdorur për këtë qëllim mjetet që kanë në dispozicion (...).

Komiteti mbi të Drejtat e Fëmijës ka identifikuar nenet e mëposhtme si parime themelore të përgjithshme, të cilat formojnë bazën për të drejtat e konventës:

	Neni 2 mbi ndalimin e diskriminimit
	Neni 3 mbi interesat më të mira të fëmijës
	neni 6 mbi të drejtën për jetë, ekzistencë dhe zhvillim
	Neni 12 mbi respektimin e pikëpamjeve të fëmijës

Dhjetë vjet pas aprovimit, Konventa mbi të Drejtat e Fëmijës është bërë vepër e padiskutueshme referimi për të drejtat e njeriut. Si e tillë, ajo ka ndikuar edhe në krijimin e instrumenteve ndërkombëtare si ILO, e cila vepron kundër punës së detyruar të fëmijëve.

[Kthehu në vështrimin e përgjithshëm]

2. Realiteti

Me ratifikimin e konventës, shumë qeveri kanë filluar të nxisin të drejtat e fëmijëve dhe të fusin parimet themelore të konventës në të drejtën e tyre kombëtare. Kjo pati si rezultat ose heqjen e ligjeve që diskriminonin fëmijët, ose miratimin e ligjeve të reja për nxitjen e të drejtave të fëmijëve.

Një reagim tjetër të qeverive ndaj konventës përbën edhe krijimi i strukturave kombëtare, të cilat përqëndrohen në çështjen e fëmijëve dhe të rinjve. Gati çdo qeveri në botë ka ndërkohë një ministri, komision apo këshill, të cilat janë kompetente për çështjen e fëmijëve. Qëllimi i këtyre institucioneve është tërheqja e vëmendjes kombëtare ndaj fëmijëve, të ndjekin zhvillimin në jetën e fëmijëve dhe të nxisin të drejtat e fëmijëve gjatë vendimeve politike. Me krijimin e ligjeve dhe strukturave, qeveritë mund të zbatojnë masa të përshtatshme politike dhe programe, të cilat mbrojnë dhe nxisin të drejtat e fëmijëve.

Pavarësisht nga ky zhvillim pozitiv, para nesh mbetet akoma një rrugë e gjatë për t'u bërë deri në zbatimin e plotë të Konventës në të gjitha pjesët e botës. Në dhjetë vjetët e fundit është arritur një përparim i dukshëm. Mbi 80 % e fëmijëve të botës vaksinohen kundër sëmundjeve të fëmijëve, siç është paraliza e fëmijëve. Mundësia e furnizimit me ujë të pijshëm, që nga viti 1990 është rritur me 10 %. Sfidë e ardhshme mbetet përfshirja e fëmijëve deri tani të papërfshirë në këtë zhvillim.

Si pasojë e sëmundjeve të fëmijëve si diarreja, bronkiti, malarja dhe fruthi vdesin çdo vit rreth 12 milionë fëmijë. Ndërsa në disa vende, një në pesë fëmijë vdes para se të mbushë pesë vjeç. Shumica e këtyre fëmijëve vuajnë nga varfëria dhe ushqimi i pamjaftueshëm dhe nuk kanë mundësi për përkujdesje shëndetësore, e cila do t'iu mundësonte një zhvillim të shëndoshë.

Rreth 130 milionë fëmijë të moshës shkollore nuk e ndjekin shkollën. Dy e treta e numrit të tyre janë vajza. Këtyre fëmijëve u mohohet e drejta e tyre themelore për arsimim. Supozohet se në fillim të këtij shekulli, 855 milion njerëz - një e gjashta e njerëzimit - do të jenë analfabetë. Këto statistika pasqyrojnë përmasën e sfidave që kemi para nesh.

Rreth 250 milionë fëmijë punojnë, miliona prej tyre në kushte që rrezikojnë seriozisht ekzistencën, dëmtojnë shëndetin e tyre dhe e bëjnë të paumndur zhvillimin e personalitetit të tyre. Një milionë fëmijë në vit bien viktimë e tregtisë ilegale seksuale. Supozohet se një milionë fëmijë në vit shiten apo bëhen objekt tregtie, si brenda, ashtu edhe jashtë kufijve kombëtarë. Shumë fëmijë janë të detyruar të jetojnë në kushte skllavëruese. Faktori i përbashkët i këtyre statistikave është shfrytëzimi ekonomik. Fëmijët prapa këtyre shifrave janë viktima të kësaj forme keqpërdorimi.

Në dhjetë vjetë që nga aprovimi i Konventës, në shumë pjesë të botës ka pasur situata të vështira ekonomike. Ngarkesa e sistemeve, edhe pa to të paqëndrueshme, është rritur edhe më tej. Viktimat kryesore kanë qenë fëmijët. Ndërgjegjja botërore për të drejtat e fëmijëve, indinjata publike ndaj shkeljeve të shumëllojshme të këtyre të drejtave dhe rezonanca e madhe në media, dhjetë vjet më parë do të kishin qenë të paimagjinueshme. E gjithë kjo ka kontribuar në zvogëlimin e ndikimeve negative të krizave tek fëmijët (...).

Të drejtat e njeriut janë të lidhura ngushtë dhe të varura nga njëra- tjetrën. Shkelja e një të drejte sjell shpesh shkeljen e shumë të drejtave të tjera. Fëmijët më të varfër me mundësi më të pakta arsimimi dhe me përkrahje më të vogël nga familja e tyre janë më të rrezikuarit nga shfrytëzimi ekonomik. Fëmijët, të drejtat e të cilëve nuk përfillen, apo nuk mbrohen në fusha të tjera, bëhen lehtë viktimë e shfrytëzimit ekonomik. Veçanërisht të prekshme janë vajzat. Në shumë shoqëri, ato konsiderohen si më pak të rëndësishme dhe keqtrajtohen seksualisht apo detyrohen të merren me prostitucion.

Terre des hommes - në këtë aspekt përkrah projekte të shumta, të cilat merren me shkaqet e shkeljeve të të drejtave të njeriut. Lufta kundër varfërisë dhe krijimi i mundësive të arsimimit mbetet gjithnjë një pikë kryesore e këtij angazhimi.

[Kthehu në vështrimin e përgjithshëm]

3. Shembuj nga aktiviteti i terre des hommes

(a) Neni 32. Shfrytëzimi ekonomik - Maurice Sixto Home e fëmijëve në Haiti, të cilët punojnë si shërbëtorë nëpër familje

Haiti është një ndër vendet më të varfëra të botës. Për shkak të kushteve shumë të vështira të jetesës, shumë familje fshatare i dërgojnë fëmijët e tyre në qytet me shpresën për t'iu përmirësuar kushtet e jetesës dhe për t'iu ofruar mundësinë e shkollimit. Shumica e këtyre fëmijëve janë vajza, disa prej tyre nën moshën 12 vjeç, të cilat u besohen familjeve në qytet si shërbëtore. Numri i tyre supozohet të jetë 200.000. Me këtë rast nuk ekzistojnë rregulla ligjore për pagimin e punës së tyre. Fëmijët jetojnë të ndarë nga familjet e tyre, punojnë deri në 18 orë në ditë, nuk kanë mundësinë e shkollimit dhe shpesh keqtrajtohen seksualisht. Kjo ishte arsyeja e themelimit të Maurice Sixto Home, para dhjetë vjetësh.

Terre des hommes - në Zvicër, përkrah Maurice Sixto Home, projektin për fëmijët që punojnë si shërbëtorë nëpër familje, për t'iu dhënë këtyre fëmijëve mundësinë e shkollimit, për të rritur besimin e tyre te vetja, për nxitjen e zhvillimit të aftësive të tyre si dhe për të rritur ndërgjegjësimin e tyre në lidhje me shkeljet e të të drejtave të tyre. Maurio Sixto kontakton punëdhënës, me qëllim që këta të pranojnë fëmijë. Punëdhënësit ftohen një herë në muaj në shtëpinë e fëmijës dhe informohen rreth aktiviteteve të saj. Në këtë mënyrë synohet ngritja e ndërgjegjësimit mbi situatën dhe të drejtat e fëmijëve. Në këtë mënyrë, bashkëpunëtorët e projektit mund të angazhohen paraprakisht kundër keqtrajtimit dhe mospërfilljes. Maurio Sixsto si organizatë përpiqet ndër të tjera edhe për riintegrimin e fëmijëve në familjet e tyre.

Fëmijët përkrahen përmes aktiviteteve të ndryshme, punohet rreth zbulimit të talenteve dhe aftësive të tyre, për të nxitur në këtë mënyrë besimin e tyre te vetja. Fëmijët ndjekin disa orë në ditë programin arsimor të Maurio Sixsto Home, i cili është munduar të përpilohet mundësisht i ngjashëm me programet e shkollave të rregullta. Përveç kësaj, ata përvetësojnë edhe zanate të ndryshme si rrobaqepës, zdrukthëtar, kuzhinier etj. Fëmijëve u jepet çdo ditë një vakt, ndërsa çdo të premte mbrëma, të gjithë fëmijët mblidhen së bashku në darkë me punëtorët socialë të projektit në fjalë.

[Kthehu në vështrimin e përgjithshëm]

(b) Neni 37 dhe 40. Gjykimi i të miturve - shkollimi i personave, të cilët kanë kontakt profesional me fëmijët që kanë rënë në konflikt me ligjin

Me gjithë ekzistencën e ligjeve kombëtare dhe ndërkombëtare, të cilat ndalojnë burgosjen e fëmijëve që kanë rënë në konflikt me ligjin, fëmijët janë të konfrontuar me arrestime dhe keqtrajtime të ndryshme. Në sistemet penale fëmijët trajtohen keq. Atyre nuk u jepen shumë të drejta dhe mundësi, të cilat merren parasysh tek fëmijët në fushën e së drejtës civile. Në sistemin e së drejtës penale, fëmijët nuk gëzojnë të drejtat që gëzojnë të rriturit.

Fondacioni i "terre des hommes" në Lozanë të Zvicrës organizon kurse trajnimi për personat, të cilat kanë të bëjnë profesionalisht me fëmijët e arrestuar dhe gjykimin e të miturve në vende të ndryshme të botës, ndër të tjera edhe në Republikën e Guinesë dhe Mauritanisë. Deri tani janë organizuar seminare për personat që kanë kontakt profesional me fëmijët e arrestuar, me qëllim që t'iu bëhet e qartë rëndësia e mbrojtjes së fëmijëve dhe respektimi i tyre.

Duke qenë e bindur se situata e një numri të madh fëmijësh të arrestuar nuk duhet të tolerohet më gjatë nga bashkësia ndërkombëtare, fondacioni terre des hommes në Lozanë ka bërë propozime për gjykimin e të miturve. Parim themelor i këtyre propozimeve është fakti se personi i mitur, i cili ka rënë në konflikt me ligjin, ndodhet në një fazë të përkohshme të zhvillimit të tij. Për këtë arsye, çdo vendim i lëshuar kundër tij mund të ketë pasoja të përhershme. Në çdo rast duhen bërë përpjekje maksimale, që të gjithë të miturve t'iu jepet mundësia e riintegrimit dhe e pjesëmarrjes së tyre në procesin e riintegrimit. Pohimet sipas të cilave kriminaliteti në rritje e sipër i të rinjve mund të luftohet duke ulur kufirin ligjor të moshës madhore dhe duke ashpërsuar dënimet me burg është pranimi nga ana e shoqërisë i dështimit të saj.

Propozimet e theksuara më lart të fondacionit "terre des hommes" në Lozanë përmbajnë:

Duhet të hiqet dënimi me vdekje dhe me burgosje të përjetshme për persona të mitur në gjithë botën, nëse ata, në kohën e kryerjes së veprës kanë qenë nën moshën 18 vjeç.

	Çdo vend duhet të zhvillojë një kod për të miturit, respektimi i të cilit duhet të mbrohet me ligj.
	Mosha e dënueshmërisë dhe mosha në të cilën mund të shpallen dënimet me heqje lirie, duhet të jetë më e lartë se mosha, në të cilën përfundon detyrimi shkollor. Vetëm gjykatësi ka të drejtë të marrë vendime për këtë.
	Vendimet mbi personat në moshë të mitur, të cilët kanë rënë në konflikt me ligjin, duhet të merren dhe të kontrollohen gjithnjë nga gjykatësi. Ato nuk duhet të konsiderohen si vendime të rëndomta administrativo-teknike.
	Jeta si lypës dhe endacak nuk duhet të konsiderohen më si vepër penale.
	Prostitutat fëmijë duhet të konsiderohen dhe të trajtohen me ligj si viktima. Palët fajtore janë pedofilët dhe ata që i detyrojnë të merren me prostitucion.
	Duhet bërë një ndarje e plotë ndërmjet të burgosurve të rritur dhe atyre të mitur, edhe gjatë nxjerrjes për të shëtitur dhe gjatë pushimit. Prania e personelit të rritur të rojes, të aftë për ruajtjen e personave të mitur është e domosdoshme.
	Koha e kaluar në burg duhet të shfrytëzohet për përfundimin e aftësimit shkollor dhe profesional të të miturve. Kjo nuk duhet të shfrytëzohet për shfrytëzimin e fuqisë së tyre punëtore, vetëm ngaqët ata kanë rënë në konflikt me ligjin.

[Kthehu në vështrimin e përgjithshëm]

(c) Neni 38. Konflikti i armatosur - Koalicioni për ndaljen e angazhimit të fëmijëve ushtarë

Të paktën 300.000 fëmijë nën moshën 18 vjeç janë të angazhuar në vatrat e krizës anembanë botës. Numri i atyre që u takojnë forcave të armatosura opozitare apo qeveritare, dhe të cilët në çdo kohë mund të dërgohen në luftë, është shumë më i madh.

Fëmijët ushtarë janë viktima të një numri të madh shkeljesh të të drejtave të njeriut. Nga vdekja dhe plagosjet ata nuk janë të rrezikuar vetëm në luftë, por edhe atëherë kur provojnë t'i shmangen rekrutimit të detyrueshëm apo të ikin nga ushtria. Ata janë viktimë e torturave dhe keqtrajtimeve, shfrytëzimit seksual, rreziqeve shëndetësore, përdorimit të drogës dhe alkoolit, ndarjes nga familja, pamundësisë për t'u shkolluar, dhe në raste të zënies rob, edhe të pushkatimeve apo dënimeve të mëdha me heqje lirie.

Duke qenë të bindur se të gjithë personat e përcaktuar sipas të drejtës ndërkombëtare si fëmijë, nuk duhet të marrin pjesë në konfliktet e ndryshme në botë. Gjashtë organizata joqeveritare kanë themeluar në korrik të vitit 1998 koalicionin për ndërprerjen e angazhimit të fëmijëve ushtarë. Qëllimi i koalicionit në fjalë është aprovimi dhe zbatimi i një protokolli alternativ të konventës mbi të drejtat e fëmijëve, i cili do të ndalonte rekrutimin ushtarak dhe angazhimin në vatra të krizës të çdo personi nën moshën 18 vjeç, si dhe kërkesa për njohjen dhe zbatimi i këtij standardi nga të gjitha forcat dhe grupet e armatosura shtetërore dhe joshtetërore. Koalicioni përbëhet nga fushata kombëtare në më shumë se 30 vende të botës.

Që nga fillimi i aktivitetit të koalicionit në fjalë kanë ndodhur disa zhvillime të rëndësishme, që kanë të bëjnë me angazhimin e fëmijëve ushtarë:

	Masat efektive në shumë shtete për ndryshimin e ligjit dhe praktikës së tyre të rekrutimit për marrjen në konsideratë të konsensusit ndërkombëtar mbi ndalimin e rekrutimit dhe angazhimit të personave nën moshën 18 vjeç.
	Statusi i Gjykatës Ndërkombëtare e konsideron krim lufte, i cili bie nën kompetencën e Gjykatës Ndërkombëtare, ftesën, rekrutimin apo pjesëmarrjen e fëmijëve nën moshën 15 vjeç në konflikte të armatosura (kombëtare apo ndërkombëtare).
	Konventa e ILO-së mbi format më të rënda të punës së fëmijëve (182). Kjo konventë detyron çdo shtet, i cili e ratifikon atë për »marrjen e masave të menjëhershme dhe efektive për zbatimin sa më të shpejtë të ndalimit dhe luftimit të formave më të rënda të punës së fëmijëve«. Fëmijë konsiderohen të gjithë personat nën moshën 18 vjeç. Ndër format më të rënda të punës së fëmijëve janë: »Të gjitha format e skllavërisë apo praktikave të ngjashme me skllavërinë, si shitja apo tregtia me fëmijë dhe e fëmijëve, puna e detyruar etj., përfshirë këtu edhe ftesën e detyrueshme për t'u dërguar në konflikte të armatosura«. Në këtë mënyrë, për herë të parë në një konventë ndërkombëtare u vendos kufiri i moshës së ushtarëve fëmijë në 18 vjeç. Konventa në fjalë është njëherazi edhe njohja e parë juridike e aktivitetit të fëmijëve ushtarë si formë pune.
	Deklarata e Ministrave Veriorë kundër angazhimit të ushtarëve fëmijë, e nënshkruar në Rejkjavik më 29 gusht 1999.

Puna e koalicionit ka ndikuar në përmirësimin e kuptimit më të madh të shkaqeve dhe pasojave të pjesëmarrjes së fëmijëve në konflikte të armatosura dhe aktivitete luftarake.

[Kthehu në vështrimin e përgjithshëm]

(d) Neni 1- 41. Fëmijët e rrugës në Indi - »Vatsalya Foundation« në Mahalaxmi, në Mumbai të Indisë

Kushtetuta e Indisë parashikon të drejtën e çdo fëmije për mundësi të barabarta dhe dinjitet. Për plotësimin e këtyre qëllimeve, Vatsalya Foundation ka zhvilluar një program, i cili përkrahet nga terre des hommes në Danimarkë për qenë pranë fëmijëve të lënë pas dore ekonomikisht.

Në Mumbai (ish Bombei) të Indisë, shumë fëmijë jetojnë në rrugë duke ikur nga rrethet e dhunës dhe keqtrajtimeve. Ata jetojnë në trotuar, parqe, nën ura. Jo rrallë ushqehen me mbeturina. Për të mbijetuar punojnë si rreckëmbledhës, pastrues këpucësh ose jetojnë me lëmoshë. Të kufizuar nga shoqëria, të privuar nga të drejtat, këta fëmijë kanë pak besim te vetja. Ata vuajnë nga depresionet dhe parimisht kanë humbur besimin te të rriturit. Sjellja e tyre është e rrezikshme dhe vetëshkatërruese duke çuar shpesh në kriminalitet.

Vatsalya ka kontakt me më se 1.500 fëmijë të rrugës të moshës 7 - 17 vjeç. Mbi 200 prej tyre vizitojnë çdo ditë qendrën në fjalë. Bashkëpunëtorët e Vatsalya-s takojnë fëmijë në vendet ku jetojnë ata. Atyre u ofrohen aktivitete në rrugë, si p.sh. këshilla apo ndihma mjekësore. Ekziston një shërbim 24 orësh telefonik, në të cilin mund të marrin pa pagesë dhe të kërkojnë ndihmë të gjithë fëmijët që kanë probleme. Ata mund edhe të fitojnë vetë duke prodhuar mbulesa tavolinash, shami, shalle dhe sende të tjera.

Strehimoret janë për fëmijët si shtëpitë e tyre. Atje ata mund të qëndrojnë dhe të largohen kur të duan. Në momentin kur më të rriturit largohen përgjithmonë nga shtëpia, ata bashkohen në grupe prej pesë personash, derisa të jenë në gjendje të kujdesen vetë për veten e tyre. Ndodh që ish fëmijë të rrugës, të cilët tashmë kanë mundësi të punojnë dhe fitojnë, të kthehen për të ndihmuar. Aktivitetet e rregullta të qendrës janë:

	Ofrimi i këshillave individuale dhe në grup, të cilat kontribuojnë në krijimin e lidhjeve të ngushta mes bashkëpunëtorëve socialë dhe fëmijëve.
	Marrja e kontaktit me familjet për riintegrimin e fëmijëve.
	Lojërat dhe programet argëtuese për nxitjen e ndjenjes së përbashkët dhe disiplinës.
	Programet shkollore në shkrim dhe lexim, formim fillestar shkollor dhe profesional, si dhe përkrahje për vazhdimin e shkollës.
	Programet për edukimin shëndetësor si higjiena trupore dhe ndihma e parë në kombinim me takimet e rregullta për diskutimin e temave si përdorimi i drogës apo AIDS.

[Kthehu në vështrimin e përgjithshëm]

4. Mësimet që duhen nxjerrë

Përvoja ka treguar se kur ekziston vullneti politik është e mundur edhe gjetja e zgjidhjeve kreative dhe të suksesshme. Mësimi kryesor i nxjerrë nga përvoja është fakti se vullneti politik përbën faktorin kryesor për një zbatim të mirëfilltë të Konventës mbi të Drejtat e Fëmijës dhe se ky vullnet mund të sjellë mobilizimin e burimeve të përshtatshme. Duke u nisur nga ky fakt, që nga aprovimi i konventës, - terre des hommes ka intensifikuar aktivitetet e saj këshilluese dhe lobiste.

Mbi bazën e përvojave të gjera dhjetvjeçare me Konventën mbi të Drejtat e Fëmijës, terre des hommes mund të formulojë dhjetë parimet e mëposhtme për zbatimin efektiv të Konventës. Këto parime janë të natyrës së përgjithshme, megjithatë ato përbëjnë një kornizë efektive për zbatimin e konventës në fjalë. Meqë ato janë të varura nga njëra-tjetra, asnjë nga këto parime nuk duhet zbatuar ndaras. Disa prej tyre u drejtohen në radhë të parë qeverive, të tjerat shoqërive civile. Sidoqoftë, të githa parimet janë të rëndësishme për çdo person, i cili në zemër ka çështjen e fatit të fëmijëve.

Fëmijët e botës nuk mund të presin më shumë, ata kanë të drejta, të cilat duhen zbatuar në çdo kohë dhe në çdo vend!

[Kthehu në vështrimin e përgjithshëm]

10 vjet - 10 parime

°°°°°°°°°°°°°°°°°°°°°°°°°°°°°°

Zbatimi i pikënisjes së bazuar në të drejta gjatë projektimit të programeve
*
Identifikimi i interesave më të mira të fëmijës dhe nxitja e tyre gjatë çdo ndërmarrjeje që ka të bëjë me të
*
Dëgjimi i zërit të fëmijëve dhe marrja parasysh e synimeve të tyre
*
Puna me partnerët vendas dhe respektimi i kulturës së tyre
*
Trajtimi i fëmijëve si zemra e një shoqërie dhe diskutimi i aspektit të pafuqisë së tyre në një masë të gjerë
*
Sigurimi i kushteve, që gjatë përdorimit të resurseve t'u jepet përparësi fëmijëve, sidomos në kohën e krizave ekonomike
*
Sigurimi i arsimimit për të gjithë
*
Sigurimi i kushteve për zbatimi e ligjeve përkatëse, të cilat parimisht njohin të drejtat e fëmijëve
*
Ndërtimi i një kulture respekti për të drejtat e fëmijëve dhe mobilizimi për zbatimin e tyre në të gjitha shtresat e shoqërisë, duke përfshirë këtu edhe ekonominë dhe mediat
*
Krijimi i vullnetit politik për një ndryshim të mirëfilltë

[Kthehu në vështrimin e përgjithshëm]

[Kreu i faqes] [Faqja startuese Të drejtat e njeriut] [Fotografi ekspozuese]

Temat: Të drejtat e njeriut  I Modele I Demokracia I Partitë I Evropa I  Globalizimi I Kombet e Bashkuara I Qëndrueshmëria

Metodat:    Didaktika politike    II    Pedagogjia e paqes    II    Metodat



Kjo ofertë Online mbi edukimin politik u zhvillua nga a gora-wissen, Shoqata e Shtutgartit për përçim dijesh përmes mediave te reja dhe edukimit politik. Në rast pyetjesh apo vërejtjesh drejtohuni Ju lutem te ne.